Lilja Bjarklind

Jæja, loksins komið afmæli. Veit ekki hvort ég sé afmælisstelpa eða kannski er ég orðinn kona loksins. Einkasonurinn sagði bara Váááááááá þegar hann heyrði hvað ég væri orðin gömul, mér líður hinsvegar alltaf eins og að ég sé bara 18 eða kannski 21 árs, ætli það beytist nokkuð þó að einu ári sé bætt við en ég er sem sagð orðin árinu eldri, fæddist um kl. 10.30. Svo er ég búinn að fá fullt af afmæliskveðjum í síma, á netinu og í tölvupósti og það ekki einu sinni komið hádegi. Þetta lítur út fyrir að verða ágætis afmælisdagur, og það spillir nú ekki fyrir að hann er á laugardegi og ég er búinn að reikna út að næsta stórafmæli verður á föstudegi eftir 5 ár en best að hugsa sem minnst um það og njóta bara dagsins í dag.

Það er brjálað að gera í vinnunni og greinilegt að sumarfríið er búið. Ég geri ekki annað en að hrinja í sófann á kvöldin þegar ég kem heim og breytist í sófadýr. Afraksturinn af allri þessari vinnu birtist í fréttablaði á morgun, geri ráð fyrir að allir bíði spenntir. Hahahaha, bara fleiri brandarar. Annars styttist í afmæli, en ég verð dirtysomething á laugardaginn. Ætla að hafa það næs með stráknunum mínum. Eiginmaðurinn er að vinna alveg til kl. 16 þannig að ég geri bara ráð fyrir rólegum afmælisdegi með spennandi og rómantískum kvöldverði. Já, ætli ég sé ekki bara farinn að hlakka smá til.

Ég er ein af þeim sem finnst barnið mitt óheyrilega fyndið, jæja hverjum finnst það ekki um barnið sitt. Hér kemur einn úr brandarhorni Kristófers Óla. En einkasonurinn var að stríða pabba sínum í kvöld með því hvað hann væri gamall. Sonurinn: "Pabbi þú ert bara kall" Faðirinn: "Nei ég er ekki karl" Sonurinn: "Jú, þú ert 3000 kall"

Það var þreyttur en stolltur strákur sem kom heim í dag eftir að hafa hlaupið Latabæjarhlaupið. Faðir hans var einnig duglegur og að sjálfsögðu er ég að springa úr stollti yfir stráknunum mínum. Fljótlega eftir að við vorum komin heim í dag þá sofnuðu báðir í sófanum í stofunni. Sjaldan hefur nokkur verið svona ánægður með verðlaunapeninginn eins og einkasonurinn þó að hann hafi haft nokkrar áhyggjur af því að þeir sem hlaupa ekki allt hlaupið fengju ekki verðlaunapening. Peningurinn fór ekki af hálsinum fyrr en hann fór að sofa og þá bað hann mig vinsamlegast um að passa verðlaunapeninginn og rétti mér hann. Einnig benti hann mér á að passa vel að læsa fram á gang svo að verðlaunapeningnum yrði nú ekki stolið í nótt.

Á morgun ætla karlmennirnir á heimilinu að hlaupa í Reykjarvíkurmarþoninu. Einkasonurinn tekur reyndar þátt í Latabæjarhlaupinu en eiginmaðurinn ætlar að hlaupa 21 km eða hálft maraþon og það finnst mér nokkuð flott. Við fengum bolina fyrir þá í Laugardagshöll í dag og einkasonurinn þurfti auðvitað strax að prófa hlaupabolinn. Hann er búinn að æfa sig fyrir morgundaginn með því að hlaupa á tásunum í hlaupabolnum og stuttbuxum út um alla íbúð. Hann er nefnilega alveg viss um að hann hleypur miklu hraðar þegar hann er í hlaupabolnum.

Á mánudaginn fór ég ásamt einkasyninum heim til samstarfskonu minnar og við týndum fullt af rifsberjum. Ég elska rifsber, bestu ber fyrir utan jarðaber. Jæja, ég týndi og einkasonurinn hafði meiri áhuga á tampolíni sem var í garðinum. Ég fékk vænan haug af rifsberjum og aðeins af sólberjum og í kvöld hafði ég loksins tíma til að bút til smá sultu og það tókst bara vel, þó að ég segi sjálf frá. Ég verð seint talin húsmóðursleg en ég er nú nokkuð stollt af því núna krukkur af heimatilbúinni sultu inni í ískáp, sem ÉG bjó til.

Mamma mín á afmæli í dag, ég óska henni innilega til hamingju með afmælið, að sjálfsögðu var farið í kaffiboð til hennar og ég fékk meira að segja með afganga sem verða líklega étnir upp til agna í vinnunni á morgun. Til hamingju með afmælið mamma.

Fyrsti vinnudagurinn eftir sumarfrí var í dag. Sumarfríið var fínt, rólegt, skemmitlegt og gott veður. Þó að eiginmaðurinn hafi fengið lítið sumarfrí þá tókst okkur að gera ótrúlega margt. Helstu atriði eru: Útilega í Þjórsárdal Sumarbústaður við Þingvallavatn um Verslunarmannahelgina með brennu og allt! Viku sumarbústaðaferð í Grímsnesið þar sem við fengum góða gesti Dagsferð á Selfoss í heimsókn til Selfyssinga Gullfoss og Geysir Þingvellir og rúntur í kringum Þingvallavatn Skógarfoss og Reynisfjara Frábært veður í sumarfríinu Óteljandi sundferðir Hjólatúrar í dalnum okkar og fleira og fleira og fleira...

Ég er mætt aftur, þeim fáu sem lesa þetta til ómældrar ánægju. Ég hef svo sem ekkert verið að auglýsa þetta blögg mikið og því haldið lesendum í lágmarki. Ég var eitthvað að spá í að hætta þar sem ég var orðin þreytt á þessu og tók því langt sumarfrí. Þegar ég var að lesa gamlar færslur núna eftir sumarfrí þá fattaði ég að það þetta er fín dagbók og ágætis leið til að fá mig til að skrifa niður hvað gerist í lífinu, þannig að ég held áfram...

... að vera í sumarfríi. Ég nýt þess í botn að vera í sumarfríi og bongóblíðunnar. Dagurinn í dag var hálfgerður letidagur en endaði með því að ég fór í dótabúð (ferð sem einkasonurinn var búinn að bíða eftir alla vikuna), til læknis og svo í kjörbúðina. Reyndar hef ég bæði þurft að fara bæði til tannlæknis og læknis í vikunni og það út af sama vandamálinu, getið þið nú. NB. Bæði tannlæknirinn minn og læknirinn minn eru í sumarfrí og því ekki hægt að ná í þau. Það er greinilega eitthvað með mig og skipulögð sumarfrí, enda alltaf hjá læknum! sbr. sumarfríið í fyrra.

Já, bongóblíða, hitamet bara slegin hægri, vinstri. Skv. fréttum sjónvarpsins var heitara hér en í Algarve í Portúgal. Svona á sumarfríið að vera!

Ég get ekki sagt annað en dagurin í dag eða réttara sagt gærdagurinn því klukkan er orðin meira en tólf hafi verið óhappadagur. Ég átti tíma hjá tannlækni sem eitt og sér gerir daginn frekar óspennandi. Á leiðinni til tannlæknis, NB yfirleitt ekki lengur en 5 mínútur að keyra þangað lenti ég á öllum rauðum ljósum, alls sex, þar af einu gönguljósi. Ég hugsaði með sjálfri mér hvað væri eiginlega í gangi en dreif mig til tannlæknis. Það kom svo í ljós þegar ég labbaði út af tannlæknastofunni og ætlaði inni í bílinn. Þá var sprungið á einu dekki og ég ákvað því að labba frekar heim og bíða þangað til í kvöld til að fá aðstoð frá eiginmanninum þegar hann kæmi heim úr vinnunni. Í kvöld var ég svo á leiðinni í grillpartý með vinnufélögunum og ákvað að dressa mig upp og fara í pils, aldrei þessu vant. Jæja, ég gafst upp á því þegar ég var búinn að eyðileggja einar sokkabuxur og einar leggings og fór bara í buxum og kom rúmlega hálftíma of seint. Grillpartýið gekk sem betur fer áfallalaust fyri...

Sáum lögregluna vera að mæla hraðann í dag þegar við vorum að keyra, við vorum að sjálfsögðu á löglegum hraða. Við spurðum þá einkasoninn hvort hann ætlaði ekki að verða lögga, það var lítið um svör svo ég spurði hann aftur: "Hvað ætlar þú að verða þegar þú verður stór?" Þá stóð ekki á svörum. "Bubbi, ég ætla að verða Bubbi og syngja Rómeo og Júlía" Þá vitið þið það.

Var að koma heim núna (sem er mjög seint svona á laugardagskvöldi fyrir úthverfamömmuna) og auðvitað þurfti ég aðeins að kíkja í tölvuna og hendað hér. Fór í þriðja skiptið í bíó í þessari viku, geri aðrir betur. Jæja, ætli maður fari nokkuð aftur fyrr en eftir einhverja mánuði. Allar myndirnar þrjár voru góðar hver á sinn hátt. Síðasta myndin sem ég sá í bíó þessa vikuna var stórmyndin The Dark Knight en við hjónin fórum saman á bíóstefnumót og sáum skemmtilega mynd. Og já það var líka uppselt á þessa mynd - eins gott að við höfðum vit á að kaupa okkur miða á netinu áður en við lögðum af stað því þegar við komum NB 25 mínútum áður en myndin átti að byrja var uppselt, og já við biðum í röð við innganginn að salnum - 2x í sömu vikunni, geri aðrir betur. En endilega drífið ykkur að sjá myndina með BATMAN!

Ekkert varð úr sundferð í dag þar sem við héldum okkur í hinum ýmsu búðum, á heitasta degi ársins hér á höfuðborgarsvæðinu. Hefði kannski verið gáfulegra að gera eitthvað annað, dagurinn var engu að síður skemmtilegur í skemmtilegum félagsskap og auðvitað rakst maður á ýmsa sem maður þekkti. Dagurinn byrjaði þó með Ikea rúmlega 10.00 þar sem hádegisverður var einnig snæddur áður en við héldum lengra, ódýrasti veitingarstaður bæjarins. Næst fórum við í Smáralindina, þá til Reynis bakara, í sérbúðina Kjöt og Fisk og loks í Bónus. Það var nú ekki mikið keypt, aðallega í Bónus en það voru þreytt mæðgin sem komu heim í dag rúmlega fjögur. Enda höfum við bara verið að slappa af síðan.

Síðustu tvo daga höfum við Kristófer Óli átt stefnumót í sundlaugum bæjarins eða kannski á höfuðborgarsvæðinu. Í fyrradag fórum við alla leið upp í Mosó og hittum þar frænku mína ásamt börnum. Kristófer Óli prófaði allar rennibrautirnar ásamt frænda sínum sem er jafn gamall og hann, þetta var ein stór rennibrautarferð í rúmlega klukkutíma (renna sér og hlaupa í næstu rennibraut) enda voru sumir þreyttir í lok dagsins. Í gær fórum við svo aðeins nær og kíktum á gömlu/nýju sundlaugina í Kópavogi ásamt vinkonu minni og syni hennar. Nú er bara spurning í hvaða sundlaug við förum í dag, tja kannski bara Laugardalslaugina...

Það eru örugglega fimmtán til tuttug ár síðan ég beið í svona bíóröð eins og í kvöld. Fór fyrst í Smárabíó en þar var uppselt á myndina, keypti því miða í Háskólabíó á staðnum og brunaði svo vestur í bæ. Þar þurfti ég að bíða í röð fyrir utan bíósalinn í um 15 mínútur áður en við komumst inn. Minnti mig á bíóferð hérna um árið í gömlu Bíóborginni (Austurbæjarbíói) þegar ég var í menntaskóla og var að fara á Dick Tracy. Verð nú að segja að þetta var alveg þess virði myndin var mjög skemmtileg, kemur manni í gott skap. Mæli með henni. Þið getið séð það betur hérna... Að hlusta á lögin minnti mig á aðra tíma, jæja ég er ekki svo gömul að ég muni eftir því þegar Abba vann Eurovision, en á mínum djammárum þá var Abba í tísku og ég kann því einhver Abbalög, reyndar furðu mörg komst ég að í kvöld.

...eru skemmtileg. Spilaði Rummikub í kvöld með nokkrum hressum stelpum og það eru ár og dagar síðan ég gerði það síðast. Það var gaman.

Einkasonurinn var dekraður í tætlur í dag. Fórum í bíó á Kung Fu Panda og svo keyptum við einnig nýtt hjól handa honum, reyndar fyrsta hjólið sem við kaupum handa honum og fyrsta tvíhjólið hans. Það er í stærra lagi en við vonumst til að hann muni einhverntíma stækka upp í það. Það er nokkuð ljóst að næstu dagar og vikur fara í hjólaferðir.

Sumarfríið byrjaði með stæl. Drifum okkur í útilegu á föstudagsmorgninum og enduðum í Þjórsárdal í bongóblíðu.