Nóvember er örugglega sá mánuður sem hefur skipt mestu máli í lífi mínu fram til þessa. Einkasonurinn fæddist í byrjun mánaðarins fyrir tveimur árum. Ég kynntist eiginmanni mínum í þessum mánuði og við giftum okkur einnig í nóvember. Ég útskrifaðist úr kerfisfræðinni í nóvember og svo eru bæði faðir minn og móðuramma fædd í þessum mánuði. Ég veit ekki hvort einhver stórtíðindi eigi eftir að gerast í lífi mínu þetta árið í nóvember en að minnsta kosti er stutt í jólin.
Siggi hjólaði í vinnuna í dag í fyrsta skipti þetta árið. Í staðinn fékk ég að fara á bílnum í vinnuna og nýtti ég mér tækifærið og svaf aðeins lengur, en mætti þó í vinnuna 20 mínútum yfir átta. Oh, það var næs. Hinsvegar er verið að yfirfara holræsin í götunni minni og ekkert vatn í allan dag frá kl. 7:45 og fram á kvöld. Þegar ég var að fara á bílnum í vinnuna voru því einhverjir vinnubílar að skoða holræsin og ég eiginlega föst inní götunni. Það endaði með því að ég gerðist lögbrjótur og keyrði þar sem ég má ekki keyra, segi ekki meir ef löggan les reglulega síðuna!
Í gær fór ég í vikulegan göngutúr með Sigurborgu frænku og í þetta skiptið kom Hulda frænka með okkur. Við löbbuðum um laugardalinn og hverfið þar í kring, í yndislegu vorveðri. Svona á lífið að vera.
Ummæli